Тышкасис ас му вöсна

Матыстчис Гöрд Победа лун. Öти семья оз сюр, кöнi эськö оз пасйыны тайö тöдчана праздниксö, кöнi эськö оз чолöмавны либö казьтыштлыны ассьыныс матысса мортнысö, войнаса ветеранöс — пöльöс ли пöчöс, батьöс ли мамöс, вокöс ли чойöс. А ыдждöдлынысö эм мыйысь олöма йöзсö, öд найö прöйдитiсны порок-пуля тшынöн, вир кисьтана тышъясöн тыр ыджыд война пыр.

Эз кокниöн вöв боевöй ордымыс и Кулöмдiнса вöвлöм салдат В.В. Пименовлöн, кодi вöрöгкöд тышкасьны веськавлiс Норвегияö.

— Унаысь вöзйысьлi фронт вылад, — казьтывлö öнi нюмсорöн Василий Васильевич. — Пыр öткажитлiсны. Öти-кö, арлыдöй эзджык тырмы, мöд-кö, дзоля тушаа вöлi. Но сэсся 1943-öд воын, кор тшукис 17 арöc, босьтicны жö. Связистö. Ичöт тушанад пö кокниджыка мöдан сюръяяс вылö кавшасьны. Связистö кö, мися, и связистö. Сылы öд, кöнкö, думайтi, телефон трубка дорын сöмын оз жö ков пукавны, йитöд кутны. И эг сорсьы. Кыдз шуласны, би пыр и ва пыр ковмис мунны ми-вокыслы, медым тыр связьöн могмöдны ассьыным полкнымöс. Медводдза экзамен сяма мойвиис миянлы, том связистъяслы, учёбка бöрын Норвегияö воигöн. А могыс вöлi нюжöдны ыджыд да паськыд ты вомöн телефон провод. Сэтчöс берегъяс пöлöн некыдз эз позь, гöгöр вöлiны немечьяс. Налöн казявтöг колiс ныр yвтiыс связьтö нюжöдны. Но кыдзи? Пыж ни нинöм эз вöв ки улын, медым вуджны тысö. Maтiгöгöpca эновтöм баракъясысь кыскалiм наръяслысь, лабичьяслысь пöвъяссö да вöчим пур. Сы вылын кывтiгмоз и нюжöдiм проводтö.

Тайö медводдза задание пöртöмыс лоис том зонлы быттьö боевöй крещенньö, код сiйö зумыда нин сувтiс войналöн помтöг каттьысь ордым вылö. А мунiс сiйö Норвегиясянь Японияöдз. Нинöм эз повзьöд, эз сувтöд коми салдатöс — ни немецкöй бомбардировщикъяслöн зырöдöмыс, ни вöрöгкöд воча паныдасьлöмыс, ни жлеч пуляяслöн помтöг швичкöмыс. Пыр повтöг пöртлiс сы водзö сувтöдöм могъяссö. Тöдiс, мый тышкасьö ас чужан му вöсна, аслас матыссаяслöн бур олöм вöсна.

Г. ИВАНОВА.

Снимок вылын: В.В. ПИМЕНОВ

Парма гор, 1999, Май 8 лун (53 №).